इन्टरनेट तीन प्रतिशत परिवारसँग मात्रै

नेपालमा कूल जनसंख्याको ९६.७ प्रतिशत परिवारसँग इन्टरनेट पहुँच छैन। राष्ट्रिय जनगणनाको आज सार्वजनिक गरिएको अन्तिम प्रतिवेदन अनुसार कम्प्युटर भएको परिवार ७.२८ प्रतिशतमात्रै छ। त्यसमध्ये २३.६६ प्रतिशत शहरी क्षेत्रमा बस्ने परिवार हुन् भने ३.३७ प्रतिशत ग्रामीण क्षेत्रमा।
यसपटकको जनगणनामा पहिलो पटक परिवारसित कम्प्युटर, इन्टरनेट, टेलिफोन, मोबाइल फोन, मोटर, मोटरसाइकल, साइकल, फ्रिज भए/नभएको तथ्याङ्क लिइएको थियो। यसअघि रेडियो र टेलिभिजनको मात्रै तथ्याङ्क लिने गरिन्थ्यो।
टेलिभिजन हुने परिवारको संख्या बढेको छ भने रेडियो हुने परिवारको संख्या घटेको छ। यद्यपि अझै सबैभन्दा बढी ५०.८२ प्रतिशतसँग रेडियो छ।
टेलिभिजन हुने परिवारको संख्या ३६.४५ प्रतिशत छ। १० वर्षअघि यो संख्या साढे २२ प्रतिशत मात्रै थियो। केवल टिभीको लाइन भएका परिवारको संख्या १९.३३ प्रतिशत छ।
टेलिफोन हुने परिवारको संख्या ७.३७ प्रतिशत छ भने मोबाइल हुनेको संख्या ६४.६३ छ।